السلام عليكم ..انتشرت الأيام دي على الفيس بوك ومعظم شبكات التواصل الاجتماعي رسايل كتير ومتنوعة ، مفادها : إنك مثلا تقدر تعرف مين اللي زار بروفايلك على الفيس بوك بسهولة ، وكمان تقدر تعرف مدة تواجده على حسابك. وفيه رسالة تانية بتقول إنك تقدر تعرف باسورد شبكات الواي فاي اللي جنبك بدون برامج … وفيه رسالة تالتة بتقول انك تقدر تشحنUC شدات بابجي موبايل ببلاش … وكمان رسالة رابعة انك تقدر تحصل على 1600 جوهرة فري فاير ببلاش … وغيره وغيره من الرسايل اللي من النوع دا … لكن السؤال: يا ترى إيه مدى صحة الكلام دا ؟ وإيه هي حقيقة المواقع دي ؟! ت
بدايةً كدا النوع دا من الرسايل بنقابله كتير في التعليقات على الفيس بوك ، وكلها تابعة لموقع مسمي نفسه MBC ويحط جنب الحروف دي أي رقم ، مرة MBC55 ومرة MBC900 … وهكذا .
المهم … مش حابب أصدم حضراتكم وأقولكم إن كل الرسايل دي ورغم إنها ما مافيهاش أي لينكات أو روابط خارجية إلا إنها وبكل أسف رسايل : فيروووووسية
والسؤال هنا : طيب يا ترى إيه هو موقع mbc دا ؟ وبيعمل كدا ليه؟؟ هجاوبكم. وهناخد رسالة كمثال رسالة (ازاي تعرف مين زار بروفايلك) كتطبيق على كلامنا
الموقع دا عبارة عن نسخة ويب بسيطة ، بيطرح عليك سؤال زهو : إزاي عرفت الموقع؟ من أي مكان يعني بالظبط؟ ويديكي بعض الخيارات : من الفيس بوك ولا من الوتساب ولا جوجل ولا الأصدقاء؟
وبعد كدا هتلاقي أي إجابة هتختارها هتوديك نفس المكان وهو سؤال واحد : إيه اللي بتفضله في الاشعارات؟ هل اسم الزائر؟ ولا اسم الزائر ووقت الزيارة؟ ولا اسم الزائر ووقت الزيارة والوقت اللي قضاه على جوا حسابك الشخصي ؟
بعد كدا هتلاقي زر للتأكد إنك إنسان مش روبوت ، ويديك أي سؤال ، زي مثلاً: إيه هو جمع كلمة رجل ؟؟ وبعدها هيتم توجيهك لصفحة فيها الرسالة اللي عليك انك تنشرها في 15 تعليق على الفيس بوك في أماكن مختلفة ، صفحات وجروبات .
إنت بقى يا مسكين بعد ما تعمل كل اللي طلبوه دا هتظهرلك رسالة (خطأ) اللي هي دي : ” المعذرة أنت لم تنشر الرسالة في 15 تعليق على الفيس بوك ، من فضلك انشرها لتفعيل الاشعارات فوراً “
وطبعاً انت هتشك في نفسك وهتصدق ، وهترجع تااااني تنشرها في جروبات أكتر وأكتر ، ولما هترجع تضغط على الزر هيظهرلك شوية إعلانات مضللة ، وهي إعلانات مالهاش أدنى علاقة لا من قريب ولا بعيد بالخاصية اللي عايزها وعمال تدور عليها .
خد بالك : هيظهرلك تعليقات كتير في الصفحة النهائية هتلاقي فيها تعليقات لناس وهميين على إنهم بالفعل قدروا يعرفوا مين زار البروفايل بتاعهم ، وطبعا كل دا كذب .
نيجي بقى للسؤال الأهم : هل فعلا أقدر أعرف مين زار بروفايلي ؟ أو أقدر أجيب باسورد الشبكات أو أو أو ؟ الإجابة وقولاً واحداً : طبعا لأ ..
خلاصة كلامي مع حضراتكم النهاردة
بلاش يا جماعة ننساق ورا مواقع فيروسية مضللة … بلاش تعرضوا نفسكم للحظر من الجروبات والصفحات اللي حضراتكم بتشيروا عليهم التعليقات دي . دمتم بخير ، وكل سنة وحضراتكم طيبين